Mi’kmawey A’tukwaqn Ujit Mikjikjk 1963

Mi’kmawey A’tukwaqn Ujit Mikjikj asukom te’sijik silkscreena’tasijik hasti-notesl na to’q Michael Francis kisiasnik 1963ek. Wla maw-weketasik, A’tukwaqn Ujit Mikjikj na nemitasik ta’n tel-wika’sik ta’n teltekl napui’kiknn ta’n kisitoql Michael Francis. Je mu a’qata’yk newtipunqik pemiaq ta’n tujiw kisito’q amskwesewey A’tukwaqn Ujit Ta’n Telipukl hasti-notesl, wnapui’kiknml na mu pasik me’ aji-wltenukul aqq welitasinukl, aqq ma’w me’ wel-pilu’pijik ila’skuk ujit wla mikjikjewe’k ila’skuk.

Me’ pukweli aqq welamu’kl eweketasikl nike’ aqq ta’n tujiw amskwesewek kisa’toqsipnn. “Ta’n Telipukl” aqq “Puklatmu’jk” ila’skuk na eweketasikisnn amalamu’kl stike’ musikiskewamu’k, tupkwanamu’k, stoqnamu’k, nijinjewamu’k, aqq maqtawe’k, na mikjikje’k ilas’kuk na eweketasiksipnn wataptekl, mekwe’kl, tapu’kl piluamu’kl stoqnamu’kl me’ na me’ wlamu’ktitew napui’kikn, aqq wapimkwe’k stike’ plamu. Me’ na wltetew napui’kikn na tetpi-tlpultijik wi’sisk stike’ atu’tuej, wowkwis, sqolj, sisipk, sunumkw, mikjikj, aqq je ma’w Kesikey Eleke’wit.

Ne’wowey ila’skw, je me’, na mawi-wlpit ta’n wejitasjit silkscreeniktuk. Pana welpijik alukk uttejk epijik, mikjikj kelnik paqjuwikk kmu’j, eyk miawe’k kaqami’tij sunumkuaq na to’q pilu’kilkik ta’n tltetew stike’ l’paewey koqowey nemitu’n napui’kikniktuk, wnuskiwaq etuiw-pemaqsinkik sunumkuaq stike’ pana l’pa pemaqsini’tij.

Stike’ A’tukwaqn Ujit Ta’n Telipukl aqq Mi’kmawey A’tukwaqn Ujit Puklatmu’jk ila’skuk, Atukwaqn Ujit Mikjikj ila’skuk metui’sketasisnik pisultijik muntiktuk aqq msit ikla’skw ewi’kasit uttejk:

Mi’kmawey A’tukwaqn Ujit Mikjikj

Ki’s sa’qek, mikjikj na maw-klu’siss a’tukowinu ujit msit sisipk aqq wi’sisk eymu’tijik Klu’skapewe’kati. Ta’n tujiw nipk na pukwelnasni witapk, pasna ta’n tujiw Kesikewey Eleke’wit wejiet oqwatnuke’l, na suel msit ta’n te’sit sisip na elaqsultijik kpite’snuk ta’n eyk wel-pisit Nipkewey Eleke’wi’skw aqq pukwelk wi’sis ki’s maskwa’lsit lame’k maqamikekk. Mikjikj mu kata’ tla’tekekw na. Tetuji-pawa’sit na tepne’tl Kesikewe’l Eleke’wilitl, Suel sikte’ kljit. Me’ katu net kewjit aqq newtukwa’lukwet.

 

Pasna, ta’n teli-ksatk witapij na tel-apoqnmalsit. Weskumaji sunumkuaq kisi-la’lkun ta’n etli-wl-pitek kpite’snuk. Kisita’sijik tla’tekenew l’miaq we’jitu’tij ta’n kisi-tl-naqa’lataq mikjikjal mu klusilin, tela’tekek mu welsutuwa’tikul aqq kesatk etlaknutk knekk aqq pukwelk. Na sunumkuaq we’jitu’tij ta’n tla’teketaq. Pema’la’titl mikjikjal ta’n wtun oqolemit kmu’j, aqq je ma’w, ne’wt kisi-so’qita’tij na mu tewjita’qw pana’tunew wtun.

 

Mu tali-ksatmuksip ta’n telqatk ta’n eyk Nipkewey Eleke’wi’skwewe’katik. Awsam-pitek ta’n tujiw pisij wi’kk aqq misewa’laji witapk. Na ktik nipk ika’qek na wnaqapemk Eleke’wi’skw apaja’la’titl Kluskapew’katikk aqq kekina’mua’titl ta’n tl-maskwa’lsitew ta’n tujiw kesik ika’q.

 

Teluemk na to’q l’miaq we’ji’j mikjikj kisi-maskwa’lsit ta’n tujiw pekisink Kesikeyewey Eleke’wit na lame’k pisitew maqamikekk etli-aknutmuajik witapk ta’n teli-pkiji-kesik.

Toqi-tl-nmitasikl, ila’skuk ujit A’tukwaqn Ujit Mikjikj na mikuamut Francis ujit ta’n teli-a’tukwej aqq ta’n tel-napui’kikej. Ta’n me’ pukwelkik amalamu’kl eweketoql aqq ta’n me’ tel-se’sa’sik na me’ nemitasik me’ kisi-mila’taqatiten.